Berndeutsche Verse zum
10-jährigen Jubiläum im Herbst 2006,
verfasst mit einem Augenzwinkern
von einer Kundin, die im
White-Cloud-Studio trainiert.


Müschterli und Erfahrige us mym 2-jährige
«White-Cloud-Läbe»


Von Beatrice Thalmann-Keist

Sid zwöine Jahr mach ig bi White Cloud mit
Scho gly han i mir gseit: Das isch der Hit!
De alte falsche Mödeli – de Haltigssünde
Geit’s jetz a Chrage – dene wott ig chünde.
Tue schwinge, radle, twiste und mi strecke
Tue myni Müski, d’Glänk und ds Chnochegstell ganz neu entdecke.
Das ig derby ou kener Fähler mache,
tuet d’Eliane beschtens überwache.

Das geit und tönt de öppe so:
Wo heit dir eui Füessli wo?
Bigoscht – scho wider hei sich die verschobe!
Ds Bruschtbei ufe – no meh nach obe!
Tüet ou a eue Dino dänke!

I weiss, I sött däm würklech mehr Beachtig schänke.

Bim Zrüggcho geng es Türmli boue!
Guet, dänk ig – häb i dyni Wirble doch Vertroue.
Der Chopf, der Hals nid füre, ufe müesse die – no chli meh!
Schon hani ds Gfüehl i syg e Tänzerin im Schwanesee.
Wenn’s sich um X- um O-Bei sötti handle?
Dank White Cloud cha me süferli die i’nes römisch II umwandle.

Mir tüe chli schrübele no a den Oberschänkel
S’isch höchschti Zyt, stellt öpper die emal i Sänkel!
Das Kunst-Stück chönnt der Eliane no glinge
Ou myni chrumme Zähn i d’Pepsodentregglame richtig z’bringe!
Es dünkt mi mängisch – s’sisch zum Lache
d’Frou Eicher chönn us schwarze Wulche ou no wyssi mache!

Herr Nadir isch da druuf mit Rächt speziell versässe.
E Stund wirsch ghalte sanft in Trab;
zum Dessert git’s de noch e Chnebel unter d’Arme, so’ne länge Stab,
Zum Längzieh-Deeeehne no nes Mal.
Wärsch weniger verroschtet, wär das gwüss gar kei Qual.
E Stund vergeit da wie im Schnutz.
Bim Umzieh gschpürsch für ds nächste Mal du scho Fidutz.

Wenn a re Kasse warte muesch ir Schlange, i’ire länge
und Gschtressti sytlech no wei füredränge,
ganz glasse chani das jetz näh.
Tue eifach a my Dino dänke und höckli ab uf dä.
Und jetz, wo nis so gmüetlech chönnti ha,
chumm i verdeckeli scho dra!

Wenn öpper meint, i tüegi übertrybe,
de cha dä mir der Buggel ufestyge.
Jetz chunnt mir plötzlech grad is Sinn:
Das Lyt ja gar nümm drin.
Dä isch ja wägg, dä isch verschwunde
es Treuegschänk für White-Cloud-Chunde.

Dass ds’Üebe hie e Wirkig ou uf d’Seel cha ha,
gsesch jedem Studioduurgascht scho uf 100 m aa!
Hie tuet me nid ’zig Kilo piischtend stemme,
anort uf Loufbahn meilewyt desume renne.
Hie wird vom Zentrum uus harmonisch sich bewegt,
hie wird uf Haltig gluegt und Haltig pflegt.

Hie wird nid ständig d’Pulsfrequänz dir gmässe,
hie wird mal z’ersch solid uf beidi Höcker gsässe.
Hie wird kes Glänk, kei Muskel malträtiert,
hie wird mit Köpfchen güebt und therapiert.
Chasch ligend ou no praktiziere
am Schluss das Ganze nid mit rotem Chopf quittiere.

Wirsch cherzegrad, wenn gnue tuesch üebe
loufsch nümme wi ne Wurzelschnorz, e bogni Rüebe.
Der Chopf treisch ufrächt ohne Chrone.
Ig cha nur säge, s’tuet sech würklech lohne.

Sogar im Alter chasch no viel hie a dir korrigiere,
vo mehr Beweglichkeit und Wohlbefinde profitiere.
Tuesch öppis für dyni Fitness, für dy Seel und Geischt
das cha bezüge d’Beatrice Thalmann-Keist.

Sid 10 Jahr cha me White Cloud z’Bärn betrybe.
Das tüe mer dankend üser Eliane zueschrybe.
Sie het e gueti Nase ghaa, und het es eigets Studio denn uftaa:
GYROTONIC®-Diräktimport us USA.
Es Körpertaining sanft und doch vo höchem Stand,
e Nouvauté isch’s gsi für üses Land.

Zwöi gueti Seele tüe di dört betreue
probier’s, es wird di gwüss nid reue.
D’Eleve wo hie y und uus tü gaa,
chöi mit und ohne Bräschti – chöi jedes Alter haa.

Will einer wie auf Wolken schweben,
dem kommt dies Studio hier entgegen!


Die Sprüchli, Värsli hie die widmen i
Eicher & Co. im Gässli vo de Zibeli.